24.9.12

DRAGAL. A HERDANZA DO DRAGÓN. ELENA GALLEGO ABAD




Os alumnos de 2º ESO debedes ler, nesta primeira avaliación, Dragal. A herdanza do dragón de Elena Gallego Abad que é a primeira entrega da triloxía de Dragal, o dragón galego. Agardamos que disfrutedes coa novela. Foi lida por moitos escolares de Galicia e galardoada co premio Frei Martín Sarmiento (Categoría 1º e 2º ESO). Cando a rematedes, xa podedes ler Dragal II. A metamorfose do dragón e Dragal III. A fraternidade do dragón, para completar a triloxía.

Consultade a Web oficial de Dragal e aí atoparedes información.

Vede o que afirma a autora na entrevista de Lourdes Varela :

–O segredo de Dragal é que non é necesario contar cunha idade determinada para que che goste, porque ten varios niveis de lectura diferenciados. Forma parte dunha colección de literatura xuvenil, pero conta xa con seareiros de todas as idades. Por unha banda, é unha novela de aventuras para rapaces, na que dous amigos do instituto teñen que investigar un misterio. Hai dragóns de pedra que falan, medallóns de metal en estado vivo, unhas catacumbas que conectan cun lugar máxico como a Poza da Moura… Mais a triloxía de Dragal tamén é unha serie para adultos con inquedanzas culturais, xa que ten os seus alicerces na historia medieval de Galicia, recolle tradicións celtas e bebe das fontes da alquimia. Ese é o segredo, facer realismo fantástico e unir nun mesmo texto aventuras e cultura.

Estoutra entrevista que lle fixo Carme Vidal á autora da triloxia apórtanos información de interese. Lede un anaquiño, son palabras de Elena Gallego:

Antes que escritora fun lectora, e a vida real e a fantasía van parellas na miña biografía. De nena lía moito e tiña presente o mundo da fantasía e a literatura. Dragal nace así de ma­neira paralela á miña vida real, co­mo un mundo onde me refuxiar. Con todo, hai moitos elementos na obra en que ves que está escrita por un­ha xornalista, por unha persoa que ten contacto coa escrita de actuali­dade nos medios de comunicación. Cada capítulo da historia é un relato en si propio, como cando se fai un­ha reportaxe, aínda que teña certa continuidade coas outras. A linguaxe empregada é accesíbel, como se se tratase dun edificio natural, a arqui­tectura dunha casa que ten máis va­lor canto menos se impón. Cando escribía Dragal era unha nai contan­do unha historia a unha crianza e que procuraba que lle gustase. Ao igual que a min me gustaban, cando nena, as historias dos Cinco, co misterio e a aventura que tiñan. Mais ao tempo gozaba con Xulio Verne e agora bebo tamén de Harry Potter.

Leamos e teñamos presente, nós tamén, o mundo da fantasía e a literatura. 


No hay comentarios:

Publicar un comentario